បណ្ដារុក្ខជាតិ ដែលប្រជាជនខ្មែរ និយមដាំ និងមានជំនឿថា ធ្វើឱ្យមានមានសិរីសួស្តីចូលផ្ទះ

បណ្ដារុក្ខជាតិ ដែលប្រជាជនខ្មែរ និយមដាំ និងមានជំនឿថា ធ្វើឱ្យមានមានសិរីសួស្តីចូលផ្ទះ

              ជំនឿបានឆ្លាក់ជាប់នៅក្នុងបេះដូងប្រជាពលរដ្ឋខ្មែរយើង តាំងពីយូរលង់ណាស់មកហើយ។ ហើយវាក៏មិនដែលសាបសូន្យដែរ នៅក្នុងចិត្តរបស់ពួកគាត់។ 

#ប្រភេទរុក្ខជាតិដំណាំហូបផ្លែ៖

១. ដើមទទឹម៖ តាមជំនឿការដាំមុខផ្ទះ និងត្រូវស្ថិតនៅទិសខាងកើតនៃ កាំជណ្តើរផ្ទះ ប្រជាជនមានជំនឿថា ដើមទទឹមនេះបាននាំនូវសិរីមង្គលដល់ សមាជិកនៅក្នុងក្រុមគ្រួសារ ហើយប្រសិនបើវាមានផ្លែផ្កាទៀតផងនោះ  គាត់ចំណាំថា នឹងមានលុយកាក់ទ្រព្យសម្បត្តិផ្សេងៗ ហូរចូលផ្ទះយ៉ាងច្រើនសន្ធឹកសន្ធាប់។  ក្រៅពីនេះស្លឹកវា គេក៏អាចយកទៅឆុងទឹកពិសាបានដែរ ដើម្បីឱ្យមានសុខភាពល្អគ្មានជំងឺ។

ដើមទទឹម

២. ដើមស្វាយ៖ ការដាំដើមស្វាយនៅទិសខាងជើង មានជំនឿថាមានកូនចៅបរិវារ ស្រឡាញ់ចោមរោមច្រើន។

ដើមស្វាយ

៣. ដើមដូង៖ មានជំនឿថា ត្រូវដាំនៅខាងមុខផ្ទះទិសខាងកើតដែរ ដើម្បីឱ្យកើតសិរីមង្គលដល់អ្នកដែលស្នាក់អាស្រ័យនៅក្នុងផ្ទះទាំងអស់គ្នា។

ដើមដូង

៤. ដើមទឹកដោ៖ ធម្មតាមនុស្សយើងក៏អាចរស់រានមានជីវិត បានដោយសារ ទឹកដោះ ដូច្នេះយោងតាមឈ្មោះនៃរុក្ខជាតិនេះ ធ្វើឱ្យមានជំនឿថា នាំឱ្យគ្រួសារមានភាពសម្បូរសប្បាយទាំងលុយកាក់ នំចំណីសព្វគ្រប់បែបយ៉ាង។ ម្យ៉ាងវិញទៀត កាលណាមានផ្លែផ្កា អ្នកនៅជិតខាងភូមិផងរបងជាមួយ មានសេចក្តីអាណិតស្រឡាញ់ រាប់អាន ជួយយកអាសារគ្រប់ៗគ្នាជាប់ជានិច្ចឥតដាច់នោះទេ។

ដើមទឹកដោះ

៥. ដើមចំប៉ីក្រហម៖ ដើមនេះក្រៅពីបានជួយលម្អគេហដ្ឋានហើយ ក៏មានជំនឿ ថាវាជាដើមរុក្ខជាតិ ដែលមានមង្គលជោគសិរីទាក់ទាញអ្នកផង ឱ្យស្រឡាញ់អាណិត ព្រោះភាគច្រើន វាក៏ត្រូវបានទទួលសេចក្តីរាប់អាន ដាំតែនៅក្នុងផ្ទះអ្នកមានមុខមាត់ មានទ្រព្យសម្បត្តិស្តុកស្តម្ភតែប៉ុណ្ណោះ។

ដើមចំប៉ីក្រហម

៦. ដើមក្តោប៖ ដើមនេះគេតែងដាំនៅខាងមុខផ្ទះ អមច្រកខ្លោងទ្វារចូលទាំងសងខាង ព្រោះមានជំនឿថា ពេលណាដើមនេះលូតឡើង ទៅលើកាន់តែខ្ពស់រាសីម្ចាស់ផ្ទះ ក៏លូតឡើងតាមជាលំដាប់ដែរ។ ហើយគាត់បានបញ្ជាក់ថា គ្រួសារដែលមានជីវភាព ធូធារគេក៏តែងដាំដែរ ដើម្បីលម្អផ្ទះ និងជួយលើកជោគជតារាសីខ្លួនឱ្យឡើង ដូចជាដើមនេះផង។

ដើមក្ដោប

៧. ដើមសារិកា៖ ផ្កាវាមានពណ៌ស បើវារីកច្រើនមានន័យថា ក្នុងគ្រួសារនឹងរស់នៅ ដោយមានក្តីសុខ គ្មានការឈ្លោះប្រកែកទាស់ទែងគ្នា។

ដើមសារិកា

៨. ដើមតែ៖ គេជឿថា វាជារុក្ខជាតិ ដែលមានតម្លៃម្យ៉ាងដែលមានតែគ្រួសារអ្នក អភិជន ឬទីកន្លែងគាប់ប្រសើរទេ ទើបគេនិយមដាំដែលភាគច្រើន គេបានកាត់មែកវា ឱ្យមានរូបរាងមូល ឬជ្រុងតាមតម្រូវការ។ ដូច្នេះបើដាំវានៅក្នុងផ្ទះនឹងមានសិរីជួយ លើកកិត្តិយសម្ចាស់ផ្ទះដែរ។

ដើមតែ

៩. ដើមលុយ៖ មានជំនឿថានឹងមានលុយហូរចូលផ្ទះជាច្រើនប្រសិនបើវាមានផ្កា ឬបើទោះជាគ្មានផ្កាក៏ដោយ ក៏ជឿថាអ្នកដាំនឹងមានលុយចាយដូចជាឈ្មោះវា ដូច្នោះដែរ។

ដើមលុយ

១០. ប្រទាលមានបាន៖ មានជំនឿថា នឹងមានសិរីសួស្តីដល់ផ្ទះរកស៊ីមានបាន ដូចឈ្មោះប្រទាលនេះដែរ។

ប្រទាលមានបាន

១១. ប្រទាលឆ្អឹង៖ ដោយសារប្រទាលប្រភេទនេះ មានរូបរាងដូចជាឆ្អឹង ហេតុនេះទើប គេដាក់ឈ្មោះវាថាប្រទាលឆ្អឹង និងមានជំនឿថាមិនឱ្យដាំវានៅ មុខផ្ទះទេគួរដាំនៅ ខាងក្រោយផ្ទះវិញ។ ហើយវាក៏អាចព្យាបាលជំងឺថ្លោះគ្រិច ឬភ្លាត់ឆ្អឹង បានយ៉ាងពូកែ ស័ក្តសិទ្ធិ ឬបើមានសត្វល្អិតទិចខាំក៏អាចយកទៅញីបាត់ផងដែរ។

ប្រទាលឆ្អឹង

១២. ប្រទាលជញ្ជាំង៖ មានជំនឿថាប្រទាលនេះអាចបាំងក្លិនស្អុយបានយ៉ាងមាន ប្រសិទ្ធភាព ប្រសិនបើដាំបាំងនៅទិសខាងណាដែលមានក្លិនមិនល្អ។

ប្រទាលជញ្ជាំង

១៣. ប្រទាលកន្ទុយក្រពើ៖ ជំនឿតាំងពីដើមរៀងមក ជឿថាគេមិនឱ្យដាំប្រទាលនេះនៅបរិវេណដីក្នុងផ្ទះនោះទេ ព្រោះប្រទាលនេះឈ្មោះ ជាក្រពើ គេគិតថាវាជាសត្វសាហាវគ្មានសិរីមង្គល ជាពិសេសគឺចៀសវាងការដាំនៅ កណ្តាលដី។ ប៉ុន្តតាមការពិតបើដាំប្រទាលនេះនៅក្នុងផ្ទះ គឺល្អវិសេសវិសាលណាស់ ព្រោះវាគឺប្រភេទរុក្ខជាតិឱសថ ដែលមានអត្ថប្រយោជន៍ជាច្រើនមុខសម្រាប់សុខភាព។

ប្រទាលកន្ទុយក្រពើ

១៤. ប្រទាលគុជខ្យង៖ ផ្កា និងផ្លែរបស់វាមានពណ៌សដូចជាគុជខ្យងអញ្ចឹង នៅពេលយប់ប្រសិនបើវាមានផ្កាច្រើនវិញ វាមានក្លិនប្រអូបឈ្ងុយឈ្ងប់ដូចជា នៅលើឋានសួគ៌យ៉ាងដូច្នេះដែរ។

ប្រទាលគុជខ្យង

១៥. ប្រទាលរំសាយសក់៖ តាមជំនឿកាលពីដើមតាំងពីយូរលង់ណាស់ មកហើយនៅក្នុងរឿងព្រេងបុរាណខ្មែរយើង នាងរំសាយគឺជាទេពធីតាមួយព្រះអង្គ ដែលមានមហិទ្ធិរិទ្ធិខ្លាំងពូកែអស្ចារ្យ លើសស្រីនានានៅក្នុងលោក។ ហេតុដូច្នេះបើ មានប្រទាលនាងរំសាយសក់ ដាំនៅក្នុងផ្ទះហាក់ដូចជាមានទេពធីតា មកគង់នៅចាំ ថែរក្សាផ្ទះយើងឱ្យមានសេចក្តីសុខ ក្សេមក្សាន្តយ៉ាងដូច្នោះឯង។

ប្រទាលរំសាយសក់

១៦. ប្រទាលហុងកុង៖ វាមានរូបរាងស្រស់ស្អាត គេនិយមដាំលម្អ និងជឿថាជួយ រក្សាទ្រព្យក្នុងផ្ទះ។

ប្រទាលហុងកុង

១៧. ប្រទាលព្រះខ័ន៖ គេច្រើនដាំដើមនេះ នៅតាមរបងផ្ទះ ព្រោះគាត់មានជំនឿថា វាជួយការពារសត្រូវដែលមានគំនិត ប៉ុនប៉ងអាក្រក់មកលើខ្លួនពីគ្រប់ទិសទី។ ដូចឈ្មោះ ព្រះខ័ន នេះ គឺជាអាវុធដ៏ពូកែស័ក្តិសិទ្ធិរបស់ព្រះរាជា ឬអ្នកខ្លាំងពូកែណាម្នាក់។

ប្រទាលព្រះខ័ន

១៨. ដើមមាន៖ មានជំនឿថា វានាំលាភសំណាង នាំមាសប្រាក់ចូលផ្ទះ ដូចជាឈ្មោះវាដែរ ជាពិសេសពេលវាចេញផ្លែផ្កា។

ដើមមាន

១៩. ដើមសាគូរ៉ា៖ ភាគច្រើនគេដាំនៅខាងមុខផ្ទះ ព្រោះពេលដែលវាមានផ្កាគឺស្រស់ ស្អាតណាស់ និងម្យ៉ាងទៀតក៏តំណាង ឱ្យមានលុយកាក់ហូរចូលផ្ទះច្រើន ប្រៀបដូចជា ដើមលុយយ៉ាងដូច្នោះដែរ។ នៅស្រុកយើងវាច្រើនចេញផ្កានៅខែមិនា ឬមេសាមុនចូលឆ្នាំខ្មែរ។ តែបើវាចេញផ្កានៅចំពេលថ្ងៃចូលឆ្នាំខ្មែរវិញ ជឿថាគ្រួសារនឹងមានសេចក្តីសុខ មានលុយចាយហូរហែ។

ដើមសាគូរ៉ា

២០. ដើមកន្ទួត៖ គេដាំវានៅខាងលិចផ្ទះ ព្រោះវាមានរសជាតិជូរ មិនឱ្យដាំនៅខាង មុខផ្ទះឡើយ។ ប៉ុន្តែគេក៏មានជំនឿថាមានញាតិមិត្តស្រឡាញ់រាប់អានមកពី គ្រប់ទិសទី។

ដើមកន្ទួត

២១. ដើមរាជឆ្ពឹះ ឬរាជព្រឹក្ស៖ ដើមនេះក៏មានមង្គលដូចជាដើមផ្សេងៗដែរ ជាពិសេស នៅរដូវចូលឆ្នាំប្រពៃណីខ្មែរយើង ចាស់ៗមួយចំនួនយល់ថា​ប្រសិនបើវាមានផ្កាពណ៌លឿងរីកចេញមកច្រើនស្គុះស្គាយនោះក៏មានន័យថា គ្រួសារយើងនឹងមានលាភសំណាង មានលុយកាក់សម្បូរសប្បាយណាស់។

ដើមរាជឆ្ពឹះ ឬរាជព្រឹក្ស

២២. ដើមផ្កាអូគីដេ៖  គេតែងដាំវាដើម្បីលម្អហាង និងមានជំនឿថាវានាំភ្ញៀវមកចូលហាងបានកាក់កបជារៀងរាល់ថ្ងៃ។

ដើមផ្កាអូគីដេ

២៣. ដើមខ្នុរ៖ គេដាំវានៅក្នុងបរិវេណផ្ទះ និងមានជំនឿថាដើមខ្នុរនេះអាចជួយ ទប់ស្កាត់គ្រោះចង្រៃ ការពារឋានៈយសសក្តិរបស់គ្រួសារឱ្យនៅគង់វង្សល្អផ្ចាញ់សត្រូវ អាក្រក់ផ្សេងៗ។

ដើមខ្នុរ

             បណ្ដារុក្ខជាតិទាំងនេះ សុទ្ធតែផ្ដល់ផលប្រយោជន៍ដល់យើងទៀត ដូចជា ធ្វើជាគ្រឿងឧបភោគ បរិភោគ ជាដើម។ល។